Komisioneri Publik ka kërkuar ditën e sotme shkarkimin nga detyra të drejtuesit te Prokurorisë së Kavajës, Artan Madani. KP ankimoi vendimin e Komisionit të Pavarur të Kaulifikimit, i cili e rikonfirmoi në detyrë më 1 korrik të këtij viti.
Sipas KPK, Madani rezultoi i pastër në të gjitha shtyllat e vlerësimit. Nga ana tjetër, Komisioneri Publik shprehet se Artan Madani nuk plotëson kushtet për konfirmimin në detyrë.
“Komisioneri Publik, pasi shqyrtoi vendimin e Komisionit të Pavarur të Kualifikimit, si dhe mori në konsideratë rekomandimin e paraqitur nga Operacioni Ndërkombëtar i Monitorimit për të paraqitur ankim, vlerëson se, bazuar në provat dhe faktet e administruara nga Komisioni i Pavarur i Kualifikimit, subjekti i rivlerësimit, z. Artan Madani, nuk plotëson kushtet për konfirmimin në detyrë” thuhet në njoftimin e Komisionerit Publik.
Madani ka punuar si prokuror në Durrës, më pas, ka drejtuar Prokurorinë e Lezhës dhe është rikthyer sërish si prokuror në Prokurorinë e Durrësit. Ai e nisi karrierën në sistemin e drejtësisë në vitin 1994.
