Shqiptarët mburren me të drejtë se janë ndër kombet e pakta në Evropë, që i shpëtuan hebrenjtë e strehuar gjatë Luftës së Dytë Botërore. Por krahas meritës individuale të qindra familjeve, kjo nuk do të qe e mundur pa ndihmën e zyrtarëve shqiptarë, që ishin pjesë e administratës gjatë pushtimit. Kolë Bibë Mirakaj ishte Ministër i Brendshëm në qeverinë kolaboracioniste në periudhën maj-shtator 1943.
Në prag të largimit të trupave italiane, dhe ardhjes së atyre gjermane, Mirakaj shpëton mbi 2 mijë hebrenj të strehuar në Shqipëri. Nëpërmjet një urdhri të datës 31 gusht, Mirakaj autorizoi pajisjen me pasaporta shqiptare, të të gjithë hebrenjve që ndodheshin në territorin e vendit.
Me pasaportat shqiptare, shumë prej tyre mundën të udhëtonin dhe gjenin strehë në Italinë jugore, e çliruar në atë kohë nga forcat aleate anglo-amerikane. Megjithatë regjimi komunist nuk ia njohu këtë meritë. Damka e bashkëpunëtorit të pushtuesit, peshonte shumë më tepër.
Në fundin e luftës, Mirakaj u arratis jashtë shtetit, ndërsa shumica e familjes dhe farefisit të tij përjetoi kalvarin e burgjeve dhe kampeve të internimit të diktaturës.
