Një sasi prej 33.5kg kokainë është gjetur mesditën e kësaj të enjteje në Portin e Durrësit. Lënda narkotike është gjetur në kontejnerët me banane të firmës “BanaKing”, rast ky i përsëritur.
Droga ishte e ndarë në 31 pako, me peshë totale 33.5 kilogramë të vendosura në 2 arka bananesh. Kamioni ku ishte vendosur droga rezultoi i pastër në skaner, por pas informacioneve të anti-drogës për një sasi të konsiderueshme, kanë detyruar hetuesit të nisin një kontroll fizik me qen të arkave me banane, nga ku u zbulua dhe sasia e kokainës.
Për pasojë, janë shoqëruar 8 persona, pjesëtarë të “BanaKing”, por edhe punonjës të skanerit në Portin e Durrësit. Përfaqësuesit e kompanisë pritëse të bananeve kanë mohuar të jenë të përfshirë në trafikimin e kokainës.
Ata kanë deklaruar para agjentëve të Antidrogës se s’kanë asnjë lidhje me lëndën narkotike, dhe s’kanë pasur dijeni për praninë e saj në arkat me banane.
“Nuk kemi asnjë përgjegjësi pasi neve si kompani porosinë e bëjmë në rrugë elektronike, dhe s’jemi fizikisht në Ekuador. Nga ta dimë neve se çfarë kanë arkat brenda?!
Mund ta linit ngarkesën të mbërrinte në magazinat tona, dhe nëse neve zbulonim se kishte kokainë dhe se raportonim atëherë kjo përbënte shkelje ligjore.
Ne presim banane, se çfarë ka kontejneri brenda nuk kemi se si ta dimë. Grupet kriminale e përdorin linjën pa dijeninë tonë. Ky është një problem për ne, sepse na shkatërron biznesin.
Ne jemi të pafajshëm pasi s’kemi asnjë dijeni për lëndën narkotike“, kanë deklaruar përfaqësuesit e kompanisë pritëse të bananeve me seli në Tiranë.
Ministri i Brendshëm, Bledi Çuçi ka reaguar pas aksionit të policisë në Portin e Durrësit, ku u sekuestruan 33.5 kg kokainë të fshehur në një kontenier bananesh.
Në reagimin e tij Çuçi vlerëson punën e policisë, ndërsa thekson se kjo është prova e radhës e punës së shkëlqyer hetimore dhe operacionale, e luftës pa kompromis përballë krimit të organizuar.
“Përgëzime Policisë së Shtetit për goditjen e suksesshme në Portin e Durrësit, ku u sekuestruan 33.5 kg lëndë narkotike e dyshuar si kokainë. Prova e radhës e punës së shkëlqyer hetimore dhe operacionale, e luftës pa konpromis përballë krimit të organizuar dhe dëshmi e pakontestueshme e vendosmërisë tonë për të rritur gjithnjë e më shumë forcën goditëse të Policisë së Shtetit ndaj grupeve kriminale. Operacioni vijon”, shkruan Çuçi.
