Sekretari i Përgjithshëm i PD, Gazment Bardhi ka reaguar pas refuzimit që kryeministri Edi Rama, i bëri thirrjes së Komisionerit të BE, Oliver Varhelyi, që qeveria të presë opinionin e Komisionit të Venecias për ndryshimet kushtetuese të 30 korrikut.
Bardhit thotë, se Rama duhet të shpjegojë pse ka frikë nga ekspertiza e Komisionit të Venecias dhe pse i trembet zgjedhjeve demokratike sipas standarteve europiane.
Sipas Bardhit, Refuzimi i Ramës ndaj apelit të Komisionerit, është një tjetër dëshmi që për Partinë Socialiste interesi i mafias është mbi interesin e Shqipërisë.
Postimi i Bardhit në Facebook
Edi Rama duhet të shpjegojë pse ka frikë nga ekspertiza e Komisionit të Venecias dhe pse i trembet zgjedhjeve demokratike sipas standarteve europiane. Shqiptarët nuk i kanë borxh Edi Ramës pengmarrjen e Shqipërisë.
Refuzimi brutal i Edi Ramës ndaj apelit të Komisionerit për Zgjerimin në BE z. Oliver Varhelyi është një tjetër dëshmi që për Partinë Socialiste interesi i mafias është mbi interesin e Shqipërisë. Asnjë Kryeministër më parë nuk ka vënë në rrezik integrimin europian të Shqipërisë dhe nuk ka sfiduar hapur Bashkimin Europian për llogaritë e tij politike të ditës.
Oliver Varhelyi, i bëri thirrje parlamentit të mos ndërmarrë asnjë veprim për Kodin e ri Zgjedhor përpara se të japë një përgjigje komisioni i Venecias.
Kjo thirrje u refuzua nga Kryeministri Edi Rama, i cili tha se ndryshimet e Kodit Zgjedhor do të votohen në Parlament pa pritur Komisionin e Venecias.
