E dini që Kina përdor një kod dixhital, për të identifikuar nëse personat janë të infektuar me koronavirus apo jo? Teknologjia ka ecur me hapa të shpejtë, duke mundësuar edhe pikasjen e personave të prekur nga virusi vdekjeprurës. Por si mund të arrihet kjo? Është fare e thjeshtë, me anë të një aplikimi të vetëm.
Qeveria kineze ka përdorur një sistem “kodi shëndetësor” të bazuar në ngjyra, për të frenuar përhapjen e koronavirusit.
Kodet e përgjigjes së shpejtë automatike, zakonisht të quajtura kodet QR, u caktohen qytetarëve, si një tregues i gjendjes së tyre shëndetësore. Sistemi u lançua më 11 shkurt nga Alipay. Për të marrë një kod shëndetësor, qytetarët duhet të plotësojnë informacionin e tyre personal, ku përfshihet emri, numri i pasaportës dhe numrin e telefonit në një faqe regjistri.
Më pas u kërkohet të raportojnë historinë e udhëtimit, dhe nëse kanë qenë në kontakt me ndonjë pacient të konfirmuar ose të dyshuar me Covid-19 në 14 ditët e fundit. Ata gjithashtu duhet të plotësojnë kutitë për çdo simptomë që mund të kenë: ethe, lodhje, kollë e thatë, hundë e zënë, hundë e rrjedhshme, dhimbje në fyt ose diarre.
Pas kalimit të kësaj procedure fare të thjeshtë, janë autoritetet që i verifikojnë. Më tej, secilit përdorues do t’i caktohet një bar-kod në të kuqe, portokalli ose jeshile.
Një kod i gjelbër do të thotë që personi është i shëndetshëm dhe i sigurt për të udhëtuar. Ata mund të lëvizin nëpër qytet lirisht, sipas një deklarate të lëshuar nga autoritetet. Përdoruesit me një kod të kuq, duhet të kalojnë në vetë-karantinë për 14 ditë, përdoruesit me një kod portokalli do të karantinohen për shtatë ditë.
