Shqipëria nuk ka të dhëna të sakta, për një ndër tërmetet më shkatërrues të shekullit të fundit. IGJEUM regjistroi vetëm 15 sekondat e para të tërmetit, për shkak të ndërprerjes së energjisë elektrike në stacionin e Durrësit. Ky është konkluzioni që arriti Kontrolli i Lartë i Shtetit, nga auditimi i cili nisi në 21 janar deri në fund të muajit mars. Auditimi tregoi se IGJEUM punon me 67.6% të stafit të miratuar. Konkretisht në IGJEUM janë 48 punonjës nga 71 që parashikon ligji.
“Mungesat e burimeve njerëzore, rrit riskun e cenimit të monitorimit të plotë të aktivitetit sizmik, meteorologjik dhe hidrologjik në Institutin e Gjeoshkencave, Energjisë, Ujit dhe Mjedisit, pasi ky monitorim kryhet 24 orë pa ndërprerje. Cënimi i monitorimit të aktivitetit sizmik, mund të sjellë pasoja në jetë njerëzish dhe dëme materiale më të larta nga vlera e investimit për mirëmbajtjen e tyre”, thuhet më tej në raport.
E më tej, KLSH shënon se IGJEUM nuk ka në përbërje strukturë të teknologjisë si dhe asnjë pozicion specialisti IT, duke krijuar risk të lartë mbi identifikimin, trajtimin dhe zgjidhjen e problematikave të ndryshme të Teknologjisë së Informacionit në institucion.
Viti 2019 do të mbahet mend gjatë si një vit zie, për shkak të tërmetit ku humbën jetën 51 njerëz. Për nga shkalla e magnitudës, ky ishte tërmeti më i madh që ka goditur Shqipërinë në më shumë se dyzet vjet.
