Këshilli i Lartë i Prokurorisë ka miratuar listën finale me 3 kandidatët, që kalojnë fazën e parë të përzgjedhjes së Prokurorit të Përgjithshëm.
Në garë për kreun e prokurorisë janë Olsian Çela, Arta Marku dhe Fatjona Memçaj.
Në datën 13 nëntor, duke filluar nga ora 09:30, do të zhvillohen intervistat me të tre kandidatët në garë, sipas rendit alfabetik.
Vendimi:
Vendimet e marra në mbledhjen plenare të datës 29 Tetor 2019
Këshilli i Lartë i Prokurorisë ka miratuar sot në mbledhjen e radhës e zhvilluar në sallën e mbledhjeve në Prokurorinë e Përgjithshme, listën me emrat e kandidatëve për Prokuror të Përgjithshëm, të cilët plotësojnë kushtet ligjore pas vlerësimit paraprak.
Mbledhja është mbajtur në praninë e 9 anëtarëve, dhe në mungesë të anëtarëve Besnik Cani dhe Nurihan Seiti.
Në bazë të nenit 148/a të Kushtetutës, të nenit 22 të ligjit nr.97/2016 “Për organizimin dhe funksionimin e Prokurorisë në Republikën e Shqipërisë”, si dhe nenit 17/pika 4 të rregullores “Për kriteret dhe procedurën e përzgjedhjes së kandidatëve për Prokuror të Përgjithshëm”, Këshilli i Lartë i Prokurorisë vendosi miratimin e listës me emrat e kandidatëve për Prokuror të Përgjithshëm, të cilët plotësojnë kushtet ligjore sipas rendin alfabetik si më poshtë:
- Arta Marku
- Fatjona Memçaj
- Olsian Çela
Kandidatët të listuar në këtë vendim do të vazhdojnë garën e mëtejshmë për pozicionin e Prokurorit të Përgjithshëm. Ky vendim është miratuar me shumicë votash.
Gjithashtu, Këshilli i Lartë i Prokurorisë, në vijim të procesit të vlerësimit të kandidatëve për Prokuror të Përgjithshëm, njofton se në datën 13 nëntor 2019, duke filluar nga ora 9:30, do të zhvillohen intervistat me të tre kandidatët në garë sipas rendit alfabetik.
Në zbatim të nenit 19, pika 1 te rregullores “Për kriteret dhe procedurën e përzgjedhjes së kandidatëve për Prokuror të Përgjithshëm”, intervistat me kandidatët do të regjistrohen me audio dhe video. Kandidatët do të njoftohen nominalisht dhe në adresën e postës elektronike që ata kanë deklaruar në momentin e aplikimit.
Pak ditë më parë u skualifikua nga gara avokati Lulzim Alushaj, pasi nuk plotësoi kushtin e pasjes 15 vjet përvojë pune si jurist, ndërkohë që ky i fundit e ankimoi vendimin. Pas përballjes me KLP në Gjykatën Administrative, juristi sërish humbi gjyqin, pasi trupa gjykoi se ishte larguar nga gara me të drejtë.
Aktualisht postin e Kryeprokurores e mban njëra prej kandidateve Arta Marku, e cila u emërua e përkohshme në detyrë më 18 dhjetor të vitit 2017. Emërimi i saj shkaktoi shumë polemika, pasi një post i tillë i përkohshëm nuk përcaktohet në Kushtetutën e vendit.
