Klitschko: Ai është më i miri, i vetmi që mund të unifikojë titujt e peshave të rënda

Wladimir Klitschko, ish-kampioni i peshave të rënda dhe një ndër ikonat e boksit, është shprehur se britaniku Joshua është i vetmi që mund të bëjë unifikimin e titujve kampion bote të kësaj kategorie. Por që ta arrijë këtë Joshua do ti duhet të fitojë dy duele mjaft të forta, atë me Joseph Parker që mbanë titullin e kategorisë WBO dhe Deontay Wilder që mbanë titullin WBC. Britaniku ka në plan që të ndeshjet me të dy këta boksierë, pasi dëshiron që të mbahet mend gjatë në histori. Joshua deri tani mbanë titujt e kategorisë WBA dhe IBO. Ukrainasi Klitschko u tërhoq nga sporti pak muaj më parë, pas humbjes me “KO teknik” në raundin e 11-të ndaj Joshua dhe shprehet në një intervistë për mediat se rivali i fundit mund ta ndjekë famën e tij.“Unë ia kam dhënë pishtarin një luani të ri. I uroj nga thellësia e zemrës që ai të vazhdojë ta mbajë sa më gjatë pishtarin dhe të jetë i suksesshëm ashtu siç kam qenë edhe unë. Joshua është i aftë t’i unifikojë titujt kampionë bote, unë jam i bindur për këtë që them”, tha Klitschko, që u mund nga Joshua përballë 90 mijë shikuesve në duelin e madh të zhvilluar këtë vit në stadiumin “Wembley”.Më tej, boksieri ukrainas, një legjendë në peshat e rënda, shtoi: “Sa më shumë ndrin Joshua, aq më shumë ndrij edhe unë. Nëse unë humba ndaj tij, do të them se kam humbur ndaj një boksieri që ishte më i mirë se unë. Ajo përballje mes nesh ishte e pabesueshme. Ne të dy dueluam fort dhe u argëtuam në ring, ishte një përballje që mund ta fitonte secili nga ne. Nuk e ndjej vetën aspak humbës, pasi fitova shumë respekt, që nuk e kisha patur më parë, madje edhe kur kam qenë kampionë bote”, deklaroi Wladimir Klitschko.