Një ndër zërat më kritikë të Partisë Demokratike, Jozefina Topalli, në një intervistë për “Abc News”, ka komentuar zhvillimet e fundit politike në vend. Ish-kryeparlamentarja është shprehur për ndryshimet e Kodit Zgjedhor të propozuara nga Partia Socialiste në tryezën e Këshillit Politik, duke i cilësuar si të papranueshme.
Ajo tregon prapaskenat, ndërsa flet për një dakordësi nga lidershipi i Partisë Demokratike që këto ndryshime të socialistëve të kalojnë në heshtje, duke i mbyllur derën çdo individi apo force të re politike.
Madje Topalli ka zbuluar edhe një pakt që mund të ndodhë pas zgjedhjeve, ku flet për bashkëqeverisje mes kryedemokratit Basha dhe kryeministrit Rama. Pas zgjedhjeve të 25 prillit, thotë Topalli, Rama do të ftojë në bashkëqeverisje Lulzim Bashën.
Sipas saj, nëse PD do të kishte një drejtues të pakorruptuar, Rama do të humbte zgjedhjet. Topalli flet edhe për ringritjen e demokratëve, përmes një aksioni të brendshëm në selinë blu, të cilin e sheh rezultativ edhe nëse do të ndodh 7 muaj përpara zgjedhjeve.
“Propozimet në Kodin Zgjedhor i mbyllën derën forcave dhe kandidatëve të rinj. Heshtja e PD për mbrojtjen e sistemit, do t’i japë Ramës mandatin e tretë.
Më 25 prill, qytetarët nuk do të kenë alternativë, do zgjedhin mes të njëjtëve emra. Pas zgjedhjeve të 25 prillit, Rama do të ftojë në bashkëqeverisje Lulzim Bashën. Sikur Partia Demokratike të kishte një drejtues të pakorruptuar, të jeni të sigurtë që Rama do të humbte zgjedhjet.
Do të votoja po të kishte një lëvizje për ndryshim, një lëvizje për të rrëzuar këto tre oligarkë dhe do të punoja për këtë. Është dëshpëruese por i shoh edhe të frikësuar kur ata kërkojnë me çdo kusht që të mos lejojnë askënd të futen në abdomenin e tyre.
Fillimi i krijimit të këtyre forcave politike, ka sjellë këto ndryshime të Kodit, ato janë propozuar nga PS dhe janë mbështetur në heshtje nga PD. Unë besoj në një brez që nuk ka pse të djeg veten e vet për të mbrojtur tre kryetar partish, ndaj flas dhe prandaj do flas në çdo rast ku ka brenda ca parime, kur luftohet korrupsioni”, deklaroi Topalli.
