Akademiku dhe pedagogu i njohur Artan Fuga, në shkrimin e tij të radhës ka marrë spunto nga ngjarja e pak ditëve më parë, ku banesa e prindërve të gazetares së kronikës së zezë, Klodiana Lala, u sulmua me breshëri plumbash kallashnikovi.
Ai tregon një fakt të pakthyeshëm, se gazetarët nuk janë të lirë të bëjnë punën e tyre siç duhet.
I nxitur edhe nga një kronikë televizive për inaugurimin e punimeve të rrugës Lin – Pogradec, profesorit i bën përshtypje se asnjë gazetar nuk kishte guximin të shkonte përtej asaj që deklarojnë pushtetarët. E për këtë, ai ka një titull të goditur: “Inagurimi i një rruge dhe mjerimi i një raportimi mediatik!”.
Fuga trajton një problematikë mjaft reale, ku thotë se të gjithë presin nga gazetari, por për hir të së vërtetës, gazetaria nuk e kalon dot cakun e propagandës. Mjaft i revoltuar, akademiku Artan Fuga thotë më tej se kjo gazetari nuk i duhet as dreqit.
