Media gjermane, “Frankfurter Allgemeine Zeitung”, ka publikuar një artikull për situatën e krijuar pas protestës për Teatrin Kombëtar.
Në shkrimin e titulluar “Kjo është vjedhje ndaj publikut”, theksohet se Aleanca për mbrojtjen e teatrit ka pushtuar godinën, ndërsa përmend edhe faktin se pas prishjes së godinës priten të ndërtohen 6 ndërtesa të tjera.
“Pas protestave të studentëve dhe muajsh demonstratash kundër qeverisë socialiste, policia dhe civilët janë përleshur përsëri në kryeqytetin shqiptar, Tiranën. Bëhet fjalë për shkatërrimin e Teatrit Kombëtar të ndërtuar në vitin 1939 pas sheshit “Skënderbej”. Lëvizja “Aleanca për Mbrojtjen e Teatrit” ka mbrojtur teatrin që nga e mërkura.
Ndërtesa historike duhet të shkatërrohet dhe të zëvendësohet nga 6 rrokaqiej. Marrëveshja është kryer me një kompani private, e cila merr përsipër projektin, por edhe ndërtimin e një Teatri të ri Kombëtar në shesh.
Shitja e pronës prej 8500 metrash katrorë është shumë e diskutueshme. Qeveria shqiptare dhe Erion Veliaj, kryebashkiaku i Tiranës, thanë se gjithçka ishte bërë në shërbim të popullit. Lëvizja teatrore akuzon qeverinë për veprimtari kriminale dhe ka lëshuar një manifest që bën thirrje për mbështetje ndërkombëtare”, shkruan gazeta gjermane.
