Deputeti Ralf Gjoni ka treguar arsyet pse opozita parlamentare zgjodhi të largohet nga tryeza e thirrur nga OSBE për Reformën Zgjedhore.
Në një prononcim për mediat, Gjoni u shpreh se nuk mund të jenë kurrsesi pjesë e një tryeze që sipas tij ka për qëllim të legjitimojë një fejesë a martesë PS-PD, teksa theksoi se “braktisja”e mbledhjes ishte një formë proteste.
“Dalja jonë në shenjë protestë nuk ka të bëjë me qëllimin e tryezës, nuk mund të bëhemi fasadë e një tryeze që kthehet në tre bashkëkryetarë. Kjo bëhet për të na delegjitimuar ne dhe legjitimuar fejesën PS- PD. Kjo është një maskaradë. Të gjitha tryezat në gjirin e këtij komisionit janë për Reformën Zgjedhore. Jemi gati për bashkëpunim të sinqertë, por kjo është fasadë që mundohen për të përdorur praninë tonë në komision, gjë që nuk ka për tu lejuar, pa votën tonë s’do ketë asnjë pazar. Tani kemi mbledhje grupesh”, deklaroi Gjoni.
