Një situatë e pazakontë është regjistruar në SHBA, teksa një grua ka rezultuar pozitive me koronavirus, edhe pse kishte 3 javë që nuk dilte nga shtëpia.
Rachel Brummert, nga Karolina e Veriut në SHBA ishte aq e “tmerruar” nga ky virus, saqë kishte shmangur çdo kontakt dhe ishte izoluar në shtëpinë e saj.
Ajo vuan nga një sëmundje të sistemit imunitar që e bënin më të rrezikuar nga koronavirusi. Kështu ajo ndoqi këshillën e ekspertëve për vetë-izolim rigoroz në shtëpi, madje duke larguar dhe bashkëshortin në një tjetër dhomë të shtëpisë.
Por pavarësisht gjithë këtyre masave të marra, gruaja rezultoi pozitive me COVID-19. Ajo beson se e ka marrë nga gruaja që i sillte pazarin e ushqimeve te dera.
“Unë nuk kam pasur asnjë kontakt, as nuk e kam prekur atë. Jam e tmerruar. Nuk kam qenë ndonjëherë kaq sëmurë në jetën time dhe kaq e frikësuar”, tha ajo për mediat lokale.
Karolina e Veriut regjistron 4,857 raste infektimi dhe 96 viktima nga koronavirusi. Ndërkohë, rreth 580 mijë raste pozitive me COVID-19 janë regjistruar në SHBA, ndërsa mbi 23 mijë persona kanë humbur jetën.
