Një veteriner kinez ka vdekur pasi ishte infektuar me virusin e njohur si “Monkey B”. Viktima, 53 vjeç, është rasti i parë i dokumentuar i sëmundjes në Kinë, pasi dy kontakte të ngushta të tij, një tjetër doktor dhe një infermiere, rezultuan negativë për virusin.
Sipas Qendrës Kineze për Kontrollin dhe Parandalimin e Sëmundjeve (CDC), burri u sëmur në Mars pasi disektoi dy majmunë të ngordhur, shkruan media britanike Metro.
Ai kishte shfaqur simptoma si të përziera, të vjella e temperaturë, dhe kishte vdekur rreth një muaj më vonë më 27 maj, sipas raportit zyrtar të publikuar këtë fundjavë. Virusi Monkey B, ose virusi herpes B siç njihet gjithashtu, është i përhapur në mesin e majmunëve makaka.
Shpesh është vdekjeprurëse kur përhapet te njerëzit, megjithëse kjo është jashtëzakonisht e rrallë. Sipas CDC të SH.B.A.-së janë raportuar vetëm 50 infeksione në njerëz globalisht, dhe 21 prej tyre vdiqën.
Shumica u infektuan pasi u kafshuan nga një majmun, ose kur lëngjet nga një majmun u derdhën në lëkurën e tyre. Në vitin 1997, një studiues vdiq nga infeksioni i virusit B pasi lëngu trupor nga një majmun i infektuar iu derdh në sy.
