Vendimi i SHBA-së për të krijuar një degë të re ushtarake të quajtur Forca Hapësinore duket se nuk është pritur mirë nga Kina.
Zëdhënësi i Ministrisë së Jashtme, Geng Shuang, është shprehur se me këtë veprim SHBA nuk do të kontribuojë në sigurinë në hapësirë, por do të bëjë të kundërtën.
“Aksionet përkatëse të SH.B.A.-së janë një shkelje serioze e konsensusit ndërkombëtar mbi përdorimin paqësor të hapësirës së jashtme, minojnë ekuilibrin strategjik global dhe stabilitetin dhe paraqesin një kërcënim të drejtpërdrejtë për paqen dhe sigurinë e hapësirës së jashtme”, tha ai.
Nga ana tjetër, Geng Shuang hodhi poshtë pretendimet e Pentagonit se Pekini po zhvillon aftësi për të rrëzuar dronët amerikanë dhe aleatëve të tyre në rast të një konflikti ushtarak. Sipas tij, ky pretendim i Pentagonit është një pretekst për të krijuar Forcën Hapësinore.
“Shpresojmë që bashkësia ndërkombëtare, veçanërisht fuqitë kryesore në fjalë, të adoptojnë një qëndrim të kujdesshëm dhe të përgjegjshëm për të parandaluar që hapësira e jashtme të bëhet një fushë e re beteje dhe të punojë së bashku për të ruajtur paqen dhe qetësinë e qëndrueshme në hapësirën e jashtme”, deklaroi ai.
