Kina ka thënë se asnjë anëtar i G20-ës nuk ka të drejtë të “dëbojë një vend tjetër”, mes raporteve se SHBA dhe aleatët e saj perëndimorë po vlerësojnë nëse Rusia duhet të mbetet në grupin e ekonomive kryesore pas pushtimit të Ukrainës.
“Rusia është një anëtare e rëndësishme [e G20]”, u tha gazetarëve të mërkurën zëdhënësi i Ministrisë së Jashtme kineze Wang Wenbin, duke shtuar se Rusia i përkiste ekonomive kryesore të botës “të bashkuara” nga G20.
Ambasadorja e Rusisë në Indonezi, Lyudmila Vorobieva tha se Presidenti Vladimir Putin “dëshiron të shkojë” në samitin e liderëve të G20 në Bali, në fund të këtij viti.
Vorobieva tha se pjesëmarrja e Putinit do të “varej nga shumë, shumë gjëra, përfshirë situatën Covid, që po përmirësohet”.
Duke folur për gazetarët në Xhakartë, Vorobieva tha se shpresonte “që qeveria indoneziane nuk do të dorëzohet para presionit të tmerrshëm që po ushtrohet jo vetëm ndaj Indonezisë, por shumë vendeve të tjera në botë nga Perëndimi”.
Indonezia aktualisht mban kryesimin e radhës të G20. “G20 nuk është vetëm një samit. G20 është një proces. Ka shumë takime që janë mbajtur nga Indonezia online dhe Rusia po merr pjesë aktive në këto takime”.
Burimi i lajmit: CNN. Përshtatur nga Tirana Today
