Jo vetëm COVID-19, por për botën po përbën rrezik një tjetër sëmundje, ku sipas kërkuesve, mund të kthehet në pandemi. Përpos koronavirusit, në Kinë është shtuar frika e një gripi të ri, që mund të infektojë edhe njerëzit. Alarmi është dhënë nga shkencëtarët të cilët thonë se ky grip është shfaqur së fundmi, dhe mbartet nga derrat.
Studiuesit thonë se ky grip mund të infektojë edhe njerëzit, madje ekziston mundësia që të shndërrohet në pandemi globale. Shkencëtarët janë të shqetësuar se ky lloj virusi që mbartet nga derrat, mund të pësojë mutacion dhe do të përhapet më lehtësisht nga njëri person tek tjetri, raporton BBC.
Kërkuesit të cilët janë marrë me studimin në fjalë, thonë se ky lloj virusi duhet mbajtur nën monitorim, për të mos u shndërruar në kërcënim.
Gripi i ri që është zbuluar në Kinë, është i ngjashëm me gripin e derrit të vitit 2009, por me disa ndryshime. Ky grip mund të zhvillohet dhe të shumëfishohet në qelizat njerëzore që lidhen me rrugët e frymëmarrjes.
Gripi i derrit është sëmundje të cilën e shkaktojnë lloje të ndryshme virusesh, të cilët te derri janë endemikë. Virusi H1N1, i tipit A, nuk transmetohet nga konsumimi i mishit apo kontakti me derrin, por transmetohet nga njeriu tek njeriu, njejtë si gripi i normal, pasi është një kombinim i gjeneve të virusit të derrit, të shpendëve dhe njeriut. Ky virus konsiderohet vdekjeprurës. Gripi i derrit ka simptoma të ngjashme me gripin e zakonshëm.
Simptomat e gripit të derrave:
Shenjat dhe simptomat e gripit të derrave janë të ngjashme me ato të infeksioneve që shkaktohen nga gripa të tjerë, dhe përfshijnë:
– Ethe (por jo gjithmonë)
– Të dridhura
– Fyt të tharë
– Rrjedhje nga hundët
– Sy të përlotur
– Dhimbje trupore
– Dhimbje koke
– Lodhje
– Diarre
– Marramendje dhe vjellje
Simptomat e gripit zakonisht zhvillohet një deri në tri ditë, pasi t’i jeni ekspozuar virusit.
Shkaktarët
Viruset e tilla i infektojnë qelizat të cilat i lidhin hundën, fytin dhe mushkëritë. Virusi futet në trup kur thithni pikëza të kontaminuara ose e transferoni virusin nga një sipërfaqe e kontaminuar në sy, hundë apo gojë.
