Lidhur me denoncimet e bëra publike kohët e fundit në media, sa i takon ushqimeve me kimikate, një reagim i ashpër ka ardhur nga kryeministri Rama. Ai tha se do të dënohen minimumi me 10 vite burg të gjithë personat që injektojnë me kimikate produktet ushqimore. Rama theksoi se nëse vepra kryehet në bashkëpunim, dënimi është 10 vjet. Teksa prezantoi platformën e ndryshimeve në Kodin Penal, kreu i qeverisë shtoi po ashtu se e njëjta gjë do të jetë edhe për produktet që u ka kaluar afati i skadimit.
“Kimikatet në prodhimin e produkteve ushqimore do të dënohet me burg. Për sasinë e dënimit nuk jam dakord se më duket pak, por kur kjo vepër është kryer në bashkëpunim, burgimi do të jetë deri në 10 vjet.
E njëjta gjë edhe për të gjitha prodhimet ushqimore jashtë afatit të përdorimit të tyre. Është një problem i madh një lojë që vazhdon prej 30 vitesh që afatet shkelen.
Nuk ia ka borxh asnjë familje, asnjë fëmijë kësaj qeverie, që të rrijë dhe të bëjë sehir dhe nga ana tjetër nuk ka sjellë asnjë zgjidhje duke vendosur gjoba me subjekte të tilla.
Edhe kjo është një vepër që parashikohet të dënohet deri në 10 vjet burg. Mashtrimi me produktet është po ashtu një vepër penale, dhe besoj se duke e adresuar këtë problem kaq të madh dhe jetik, me vetëdijen se jo vetëm që nuk bëhet fjalë për të gjitha produket në Shqipëri, por për një pjesë të vogël, që sidoqoftë është e madhe për të kryer dëme dhe pasoja”, tha Rama.
