Shefi i njohur i kuzhinës, Renato Mekolli, në një intervistë në ‘Ilva Now’, u shpreh i shqetësuar për gjendjen në të cilën ndodhemi. Ai tha se bizneset po vuajnë pasojat e mbylljes, dhe se nga shteti nuk ka pasur asnjë ndihmë. Mekolli deklaron se fasha e orarit për zonat e kuqe, ka bllokuar xhiron ditore. Kjo pasi orari i vendosur, pengon lokalet për të pasur fluksin e duhur të klientelës.
“Jemi në një situatë tragjike. Restorantet prej 3 muajsh nuk kanë punë. Ndihmë nga shteti nuk ka aspak, është një situatë kaosi. Vërtetë ne kemi një orar deri në orën 21:00, por atëherë dalin të gjithë njerëzit dhe janë të qetë për të shijuar ndonjë darkë”, shprehet ai.
Renato Mekolli thotë se bizneset po falimentojnë. Kjo reflektohet edhe në biznesin e tij, ku nga 15 punonjës, në punë janë 7.
“Greqia u mbyll më vonë, dhe sot që flasim janë hapur të gjitha. Turizmi, restorantet dhe lokalet janë të hapura. Jam pro masave dhe protokollit të sigurisë, por nuk mund të na vënë kufizime. Po falimentojnë bizneset, jashtë kanë mbështetje nga shteti. Këtu nuk ka asnjë lloj mbështetje. Kjo është qesharake. Në një kohë normale, në kuzhinën time duhet të ishin 15 veta, tani janë 7 persona. Këtu çalon gjithçka se asnjëri nuk ka besim, ka dhe interesa personale dhe të gjithë nuk bëhen bashkë”, shprehet ai.
I gjendur përballë kësaj situate, shefi i kuzhinës thotë se ka vendosur që të largohet nga Shqipëria. “Kjo situatë të bën që të dalësh nga vetja dhe të thuash se ky vend nuk është për të jetuar. Shikoj që nuk kam mbështetje nga shteti, dhe njerëzit që na drejtojnë, situata është absurde. Do të largohem nga Shqipëria dhe ia kam vënë syrin Los Angeles. Dëshira ime është që të jap pasionin dhe dëshirën time, dhe të ndjej që ajo që jap të më kthehet”, tha më tej ai.
