Kryetari i Partisë Demokratike, Lulzim Basha ka përshëndetur vendimin e Këshillit të Evropës për t’u tërhequr nga monitorimi i zgjedhjeve vendore të 30 qershorit.
Ndërkohë, Basha ka sjellë në vëmendje edhe deklaratën e bërë nga ish-deputeti Gjunkshi për ministren Olta Xhaçka dhe bashkëshortin e saj.
Sipas Bashës, ky është rasti i parë në historinë e KiE që nuk monitoron zgjedhjet e një vendi anëtar.
“Këtë vit, Këshilli i Europës u tërhoq, për herë të parë në historinë e tij, nga monitorimi i zgjedhjeve lokale në një vend anëtar të tij. Sikurse e thekson vetë njoftimi i Këshillit të Europës, farsa që po përgatit Edi Rama nuk ka ndodhur në vendet e Këshillit të Europës, që nga rënia e komunizmit.
Tashmë po bëhen të qarta për të gjithë përmasat e skandalit kushtetues, ligjor dhe politik të 30 qershorit. Këtë qëndrim ia kam bërë të qartë ditët e fundit të gjithë komunitetit ndërkombëtar, veçanërisht partnerëve që po përpiqen të ndihmojnë në zgjidhjen e krizës politike. U kam shprehur të vërtetën se votimi farsë antikushtetues, antiligjor dhe i kriminalizuar do ta thellojë krizën dhe do ta fusë Shqipërinë në një fazë me kosto të lartë për vendin”, deklaroi Basha.
