Ministri në Detyrë për Punët e Jashtme, Gent Cakaj ka folur lidhur me deklaratën e Partisë Demokratike mbi tërheqjen e vëzhguesve të Këshillit Evropian për zgjedhjet vendore të 30 qershorit.
Në një deklaratë për mediat, Cakaj u shpreh se KiE nuk ka dhënë asnjë komunikim zyrtar lidhur me moszhvillimin e zgjedhjeve.
Sipas Cakajt, qëndrimi që ka artikuluar PD nuk ka lidhje me realitetin dhe të vërtetën, ndërsa shtoi se KiE ka folur zyrtarisht se zgjedhjet duhet të mbahen më 30 qershor në përputhje me legjislacionin.
“Komunikimi nuk përbën qëndrim zyrtar të KiE. Kongresi i autoritetit lokal dhe rajonal ndryshe nga Këshilli i Ministrave është një institucion këshillues brenda tij. Sidoqoftë edhe vetë Kongresi nuk ka dhënë ndonjë deklaratë në mohim të së drejtës për mbajtjen e zgjedhjeve. Kongresi nuk bën asnjë deklaratë për ligjshmërinë e këtyre zgjedhjeve.
Por rreziku vjen nga vetë strukturat e partive në fjalë. Çfarëdo thirrje në deklaratën e Kongresit duhet të shohin veten në pasqyrë. Sot KiE ka folur zyrtarisht se zgjedhjet duhet të mbahen më 30 qershor në përputhje me legjislacionin”, u shpreh Cakaj.
