Kreu i Partisë Demokratike ndodhet në Berat, ku po zhvillon një takim me banorët për çeljen e fushatës.
Basha zgjodhi ta nisë fjalimin e tij me një përgjigje jo të drejtpërdrejt ndaj Topallit dhe Imamit, të cilët kërkuan dje mbledhjen e forumeve të PD-së për shkarkimin e kreut të demokratëve.
Kreu i PD-së tha se është koha për Republikën e Re, pasi shqiptarët kanë humbur besimin te politikanët e vjetër, të cilët e kanë përdorur pushtetin vetëm për interesin e tyre.
“Një klasë politikanësh të korruptuar kanë marrë peng pushtetin duke e përdorur vetëm për interesin dhe pasurimin e tyre. Katër vitet e fundit e kanë shkatërruar besimin te politika dhe unë i kuptoj.”
Më tej, Basha sulmoi drejtpërdrejt Ramën, ndërsa kërkoi votën për uljen e taksave, hapjen e vendeve të reja të punës dhe për përmirësimin e jetesës së qytetarëve.
“Çfarë bëri Rama pas 4 vitesh në pushtet? A i rriti pensionet? A i rriti rrogat? Kush ka humbur vendin e punës të ngrejë dorën! Kush paguan më pak taksa këtu në Berat të ngrejë dorën. Kush merr shërbim shëndetësor të mirë të ngrejë dorën.
Këto pra janë të vërtetat e shqiptarëve. Çfarë ka bërë Edi Rama në këto 4 vite për Beratin? Është shtruar ndonjë pllakë?
Krenohet ditë për ditë me kalldrëmin. Qeveria ka detyra për të cilat ju kërkoi votën. Detyra numër një është ekonomia. Kjo është poshtërsia e Edi Ramës. Keni dëgjuar ndonjë fjalë për ekonominë nga Edi Rama në fushata? Keni dëgjuar këto vite, opozita ka bërë një luftë të fortë kundër krimit në parlament. Çdokush ka dëgjuar që e kemi quajtur bashkëfajtor me krimin. E vërteta është kjo: është i papërgjegjshëm. Vetëm një njeri i tillë harxhon 600 milion euro për pllaka dhe palma. Vetëm një i papërgjegjshëm rrit tarifat e arsimit. Edhe ata që nisën studimet, i kanë ndërprerë.
Me drogë thua ti, drogën s’e kemi parë, të themi atë që kemi parë. Si mund të jetë zyra e kryeministrit e mbushur me vizatime? Edi Rama shkon nga një ekspozitë, në tjetrën. Kjo është papërgjegjshmëria e tij, Shqipëria për ta është mjeti me të cilin siguron pushtetin.”/ TIRANA TODAY
