Në takimin e 100 qendrave kombëtare të mbrojtjes së të dhënave personale dhe privatësisë, kryeministri Edi Rama zbuloi bisedën me një person shumë të rëndësishëm nga një shtet anëtar i BE.
Ky i fundit, sipas Ramës, kishte kërkuar të shoqërohej me roje, që kanë kallashnikovë, dhe makina të blinduara, kur të dilte nga ambienti i VIP-ave, nga aeroporti i Tiranës për të mbërritur në kryeqytet, pasi kishte frikë.
“Kapa telefonin dhe dëgjova që do vinte një person i rëndësishëm nga një shtet anëtar i BE me shumë gazetarë dhe ishin dhe policia dhe s’pranonte të dilte nga ambienti i VIP ne aeroport për të ardhur në Tiranë dhe thashë si ka mundësi.
Përgjigja ishte ky person do që të shoqërohet me roje dhe që kanë armë të vërteta dhe që i gjithë shoqërimi të ketë makina të blinduara, i thashë me sa di unë shërbimi ynë është i blinduar. “Po por s’do të shohë pistoleta por kallashnikov”.
Më pas, Rama tregoi: “Të nesërmen në mëngjes erdhi të më takonte dhe fjalia e parë që më tha ishte “Z. kryeministër dua t’iu kërkoj ndjesë, sepse kam udhëtuar në shumë vende dhe asnjëherë nuk kam përjetuar një hendek kaq të madh nga ajo që prisja dhe nga ajo që pashë në të vërtetë. Është një vend krejt ndryshme nga ai që prisja”.
