Komuniteti i Emigrantëve Shqiptarë në Greqi ka reaguar në lidhje me vrasjen e 20-vjeçares Caroline Crouch dhe shkrimet që vinin nga mediat greke për shqiptarët. Në më shumë se një muaj kur hetuesit po analizonin krimin makabër, autori i vrasjes, bashkëshorti i së ndjerës ngriti dyshime se një ndër autorët me gjasë mund të ishte shqiptar.
Kjo sipas atij, çfarë kishte dëgjuar nga një nga tre autorët që pretendonte se kishin shkuar për të grabitur. Por në fakt e gjitha ishte një sajesë, për të cilën edhe ai tashmë ka rënë në prangat e policisë greke.
Gjatë kësaj periudhe, mediat greke vunë me ‘shpatulla pas murit’ shqiptarët, me theks të veçantë në dëshminë që dha piloti Charalambos Anagnostopoulos. Në fund të hetimeve doli se vrasësi i Caroline nuk ishte asnjë kriminel i rrezikshëm shqiptar apo gjeorgjian.
Media greke, ‘nuk humbi shansin’ për të shënjestruar shqiptarët si vrasës. Në deklaratën e Komunitetit të Emigrantë Shqiptarë në Greqi citohet se ‘media greke nuk humbet aspak shansin të kultivojë me vullnet të jashtëzakonshëm stereotipin e “kriminelit të huaj, emigrant”, akte që nxisin urrejtjen dhe racizmin në shoqërinë greke’.
Komuniteti i Emigrantëve kërkon nga mediat greke që të kërkojnë falje në publik për shpifje dhe manipulim të përsëritur, duke shfrytëzuar shqiptarët në Greqi, me propagandë të vazhdueshme, pa asnjë bazë apo informacion zyrtar.
Deklarata e Komunitetit të Emigrantëve Shqiptarë në Greqi:
“Komuniteti i Emigrantëve Shqiptarë në Greqi shpreh tronditjen e thellë dhe neverinë e ngjallur nga krimi i rëndë, që tronditi mbarë opinionin publik në vend. Si të gjithë, ndjekim të shokuar zhvillimet e fundit në hetimet e vrasjes së nënës së re në Glika Nera, nga vetë bashkëshorti i saj. Shprehim ngushëllime të sinqerta dhe mbështetjen pa kushte ndaj familjes së viktimës 20-vjeçare, Caroline Crouch! Njëkohësisht kërkojmë të përdoren menjëherë reflekset e shtetit për të siguruar një reagim të gjerë e për të dërguar pa humbur kohë mesazhin e duhur, në çdo drejtim: Vrasësi i Caroline NUK ishte asnjë kriminel tepër i rrezikshëm “shqiptar” apo “gjeorgjian” etj. Sërish media greke nuk humbet aspak shansin të kultivojë me vullnet të jashtëzakonshëm stereotipin e “kriminelit të huaj, emigrant”, akte që nxisin urrejtjen dhe racizmin në shoqërinë greke. Dënojmë thellë aktin e frikshëm të vrasësit 33-vjeçar, i cili për 37 ditë me radhë luante rolin e bashkëshortit të hidhëruar. Kërkojmë nga media greke të kërkojë falje në publik për shpifje dhe manipulim të përsëritur, duke shfrytëzuar shqiptarët në Greqi, me propagandë të vazhdueshme, pa asnjë bazë apo informacion zyrtar. Ndodh shumë vite tashmë, ka ardhur koha që ky kapitull të mbyllet njëherë e përgjithmonë, duke dënuar ashpër çdo autor përgjegjës! Le të mos kultivojmë urrejtjen në shoqërinë tonë që është dëmtuar mjaft, por ku mund dhe duhet të bashkëjetojmë të gjithë harmonikisht. Le të jemi të bashkuar kundër çdo forme dhune, sulmi ndaj të pafajshmit e vulnerabëlit, akti kriminal, për një të nesërme më të begatë për të gjithë!”.
