Besnik Mustafaj kërkoi sot dorëheqjen e Lulzim Bashës nga kreu i PD-së, pas rezultateve të deritanishme, të cilat po çojnë drejt një humbjeje të thellë Partinë Demokratike.
Pas publikimit të shkrimit se përse Basha duhej të jepte dorëheqjen, Mustafaj ka treguar në studion e “News 24” se ka marrë menjëherë një telefonatë nga kreu i Partisë Demokratike, i cili i ka kërkuar që të jetë i kujdesshëm me deklaratat e tij, në mënyrë që të mos dekurajohen numëruesit demokratë.
“Shkrimin e kam bërë në 06:00 nga shtëpia ime pasi pashë se në kutitë e para, PD ishte në humbje të madhe. Kërkova që Basha të japë sot dorëheqjen dhe t’i hapë garën zgjedhjeve në PD. Më pas ai më telefonoi dhe ishte i shqetësuar. Më tha se në këtë moment duhet të bëjmë kujdes të mos dekurajojmë numëruesit e PD-së nëpër qendrat e numërimit”, ka thënë Mustafaj.
