Për të disatën herë është shtyrë seanca gjyqësore ndaj Emiljano Shullazin dhe 4 të pandehurit e tjerë të akuzuar si pjesë e një grupi kriminal. Edhe këtë seancë dështoi leximi i pretencës nga ana e prokurorisë e cila përfaqësohet nga prokurori Besim Hajdarmataj.
Ndërsa shkak për shtyrjen e seancës në gjykatën e Krimeve të Rënda është berë mungesa e dy prokurorëve Elisabeta Imeraj dhe Eneid Nakuçi.
Imeraj ishte komanduar në një tjetër çështje ndërsa Nakuci ishte justifikuar pasi kishte me probleme shëndetësore.
Ndërkohë që në sallë nuk ishte i pranishëm asnjë prej të akuzuarve, kurse pala mbrojtëse kërkoi dorëheqjen e prokurorit Hajdarmataj nga çështja.
Avokatët e të pandehurve kanë dalë kundër përfaqësimit të akuzës nga Hajdarmataj duke e quajtur të papërshtatshëm.
Pas seancës ka folur edhe avokati i Shullazit i cili tha se organi i akuzës ka kryer disa paligjshmëri duke nisur që nga arrestimi.
“Fillimi i këtij procedimi është i paligjshëm. Është filluar hetimi pa prova. Ka paligjshmëri të kryera nga organi i akuzës duke filluar nga momenti i arrestit”, tha avokati.
I pyetur se çfarë do të ndodhë pas zëvendësimit të prokurorit, avokati tha se “do zvarritet sërish çështja”.
