Dy vëllezër kanë hipur mbi tarracën e një pallati në Durrës, duke kërcënuar se do të hidhen.
Shkak është bërë kthimi i banesave të tyre tek ish-pronarët, në lagjen nr.11. Dy vëllezërit Bejko mbajnë në duar dokumentacione teksa kërcënojnë se do hidhen, duke kundërshtuar vendimin e Gjykatës së Shkallës së Parë, ku sipas saj është vendosur që shtëpia t’u kthehet pronarëve.
Ndërkohë, familjarët e tyre janë bllokuar në apartament dhe kanë bërë të qartë nuk dalin për asnjë arsye nga banesat e tyre.
Mësohet se vëllezërit Bejko e kanë ndjekur prej katër vitesh këtë çështje ligjërisht në gjykata.
Përmbarimi ka qenë disa herë në banesën e tyre, ku jetonte prej gati 40 vitesh, ndërsa vendimi i tyre sot është i prerë.
Policia ka negociuar me dy vëllezërit Bejko, duke arritur t’i bindë ata që të zbresin nga pallati.
Çështja e vëllezërve po shqyrtohet nga Gjykata e Apelit.
NJOFTIMI I POLICISE:
Dy banorë në lagjen nr. 11 të qytetit të Durrësit deklarojnë se do të vetëvriten.
Shkak është bërë kthimi i banesave të tyre tek ish-pronarët. Përmbarimi i ka kërkuar dy familjeve që të dalin nga banesat dhe t’ua kthejnë ato ish-pronarëve. Por këta banorë pretendojnë që dokumentacioni është fals dhe nxjerrja e tyre është e paligjshme. Për këto arsye, ata kanë deklaruar se nëse do t’i nxjerrin jashtë shtëpisë do të vetëvriten duke u hedhur nga pallati.
