Jeta e ish-kryeministrit Sali Berisha, ka qenë në fije të perit në të paktën 3 raste. Më 9 maj 1996, Ilir Buzi e kërcënoi me jetë shumë pak metra afër tij në oborrin e presidencës, duke mbajtur një granatë në dorë. Ai u neutralizua me shpejtësi nga një polic.
Në marsin e vitit 1997 një grup personash sulmuan me armë godinën e presidencës, por u zprapsën nga dhjetëra njerëz besnikë të Berishës të armatosur me kallashnikovë. Më 4 qershor të po atij viti, Berisha ishte duke folur në një tubim elektoral në Shkallnuer të Durrësit, kur Ilir Çeta i hodhi një granatë tek këmbët.
Ajo nuk shpërtheu menjëherë, dhe u neutralizua në kohë nga një prej truprojave të presidentit. Fatos Nano i shpëtoi për pak një fundi alla-Gadafi në 14 shtatorin e 1998-ës, kur turma të armatosura demokratësh sulmuan godinën e kryeministrisë. Më vonë kërcënimeve apo atentateve të dështuara nuk u kanë shpëtuar Arta Dade, Neritan Ceka, Perikli Teta, Edi Rama, Ilir Meta, Saimir Tahiri, dhe Lulzim Basha.
Kërcënimet ndaj Ramës dhe Metës, kanë ndodhur pas ngjarjeve tragjike të 21 janarit në sheshin përpara kryeministrisë, ku mbetën të vrarë 4 protestues. Ndërkohë Lulzim Basha, ka pretenduar se është kërcënuar me jetë, fillimisht nga Emiljano Shullazi, dhe më pas nga trafikantë shqiptarë droge që banojnë në vende të ndryshme të Evropës. Në shumicën e këtyre rasteve, ngjarjet kanë mbetur të pazbardhura.
