Denisa është këngëtare e muzikës popullore dhe performon në club-e e në festa private, ndërsa klipet muzikore nuk janë pasioni i saj. Ajo është në treg prej vitesh dhe është mjaft e njohur edhe pse nuk jemi mësuar ta shohim shumë në televizion. Këtë pasdite, Denisa ishte e ftuar në “Rudina” për të rrëfyer për projektet e reja, për jetën artistike, por edhe për atë familjare.
Denisa ka kujtuar disa nga momentet më të veçanta artistike, ku spikat takimi me këngëtaren me famë botërore, Rita Orën, e cila i ka bërë edhe një kompliment të veçantë. Së bashku me Sidrit Bejlerin e Eranda Libohovën, Denisa u bë pjesë e dasmës private që vajza e tezes së Rita Orës oganizoi në Tiranë.
Fakti që ishte Rita, të gjithë organizatorët i kishte vënë në lëvizje, madje edhe këngëtarët ishin porositur të kishin kujdes: “Para dasmës, na e bënë gogol, na thanë ‘kini kujdes, është Rita Ora, mos i flisni, mos kërkoni foto”, – tregon Denisa, por nuk ishte fare kështu, shkruan Revista Class.
Jo vetëm që bëri foto me Denisën, por këngëtarja me origjinë shqiptare edhe këndoi këngë popullore me të gjithë. Denisa, madje, mori edhe një komliment të veçantë nga Rita: “Your voice is amazing” (ke zë të mrekullueshëm)” i tha ajo pasi e dëgjoi Denisën të performonte live.
