Kelly Clarkson dhe partneri i saj Brandon Blackstock, i dhanë fund martesës në qershor të 2020-ës. Por drama në jetën e saj nuk përfundon me kaq, pasi këngëtarja është paditur nga ish-vjehrri.
Ish-vjehrri Narvel Blackstock, është drejtuesi në kompaninë e menaxhimit të saj. Sipas Variety, kompania e drejtuar prej tij pretendon që këngëtarja i ka borxh atyre komisione që shkojnë në vlerën e 1.4 milionë dollarëve dhe se deri në fund të këtij viti, borxhi do t’i shkojë deri në 5.4 milionë dollarë.
“Për rreth 12 vite, Starstruck (emri i kompanisë së menaxhimit) e ka zhvilluar Clarkson duke e shndërruar në një yll. E ka ndihmuar atë të arrijë sukses në albumet e saj, në çmimet Grammy apo të marrë role të rëndësishme në televizion, si përshembull “The Voice”, apo në vetë programin e saj. Pavarësisht kësaj, ajo pretendon të mos paguajë më për çfarë i ka borxh kësaj kompanie”, shkruhet në akuzën kundrejt saj.
Kelly nisi të punonte me Narvel në 2007-ën, dhe ishte pikërisht ky i fundit që do t’i prezantonte bashkëshortin me të cilin u martua në 2013-in. Ata janë prindër të dy fëmijëve.
