Presidenti i Rusisë, Vladimir Putin u është përgjigjur akuzave të shumta për spiunazh ndaj shteteve të tjera duke u hedhur në kundërsulm. Ai ka akuzuar shërbimet e huaja të inteligjencës se kanë rritur aktivitetin e tyre të spiunazhit në Rusi, duke thënë se qindra spiunë janë ndaluar vetëm në vitin 2018.
Putin nuk dha detaje, por tha se është ndaluar puna e spiunazhit të “129 anëtarëve të stafit dhe 465 agjentëve të shërbimeve të huaja speciale”.
Deklarata e Putin duket si kundërpërgjigje për akuzat ndaj aktiviteteve të spiunazhit të agjentëve rusë në të gjithë botën, ndërhyrjeve kibernetike dhe ato në zgjedhje, e fundit e bërë vetëm dy ditë më parë nga kreu i Këshillit të Europës, Donald Tusk, i cili paralajmëroi vendet europiane që të kenë kujdes nga ndërhyrja e forcave antieuropiane në zgjedhjet e majit. Spiunët rusë janë akuzuar gjithashtu për një nga rastet më të zëshme të spiunazhit të viteve të fundit, helmimit të ish-agjentit Sergei Skripal në Britani.
Po ashtu, shërbimet e inteligjencës në Holandë, Çeki dhe Suedi thonë se kanë devijuar sulme spiunazhi. Në fjalimin për oficerët e Forcës së Sigurisë, FSB, Putin tha se puna e tyre ka qenë efikase, veçanërisht në mbrojtjen e të dhënave mbi zhvillimin e sistemit të armatimeve.
“Shohim agjenci të huaja inteligjence përpiqen të rrisin aktivitetin e tyre ndaj Rusisë, duke kërkuar me të gjitha mënyrat që të marrin informacion mbi sistemin politik, ekonomik, shkencor dhe teknologjik”.
