Dollari amerikan është rritur sërish, duke u favorizuar nga performanca e mirë kundrejt valutave aziatike dhe politikave në shtrëngim të Rezervave Federale. Kështu, dollari gjendet në vlerën më të lartë kundrejt lekut që prej muajit korrik, teksa sot ka shtuar 0.3 pikë kundrejt monedhës shqiptare.
Por, e kundërta po ndodh me euron, si pasojë e ekonomisë së eurozonës që gjatë tetorit ngadalësoi ritmin e rritjes.
Kështu, valuta e eurozonës e ka nisur javën në vlerën më të ulët prej disa muajsh kundrejt lekut, duke u shitur me 133 lekë dhe blerë me 133.7 lekë. Rënia vjen në një kohë që Euro ka raportin më të dobët të këmbimit me dollarin amerikan që prej muajit korrik, raporton Scan.
Një rënie të theksuar ka pësuar edhe paundi britanik, i cili ka humbur 0.2 pikë në raport me lekun, duke u këmbyer për 149.8 lekë. Megjithatë valuta e Mbretërisë së Bashkuar ndodhet ne vlera shumë më të larta se gjatë periudhës së verës, edhe pse ende larg niveleve të para referendumit për daljen nga BE.
Sa i takon valutave të tjera, Franga zvicerane e ka nisur javën e pandryshuar, ndërsa Dollari australian dhe ai kanadez kanë pësuar një ulje me përkatësisht 0.3 lekë dhe 0.8 lekë.
| Valuta | Shitet | Blihet |
| EUR/ALL | 133.00 | 133.70 |
| USD/ALL | 114.50 | 115.30 |
| GBP/ALL | 149.80 | 150.70 |
| AUD/ALL | 87.50 | 88.50 |
| CAD/ALL | 89.50 | 90.50 |
| CHF/ALL | 114.00 | 115.00 |
