Kryeministri Edi Rama e ka mbyllur konferencën e sotme me batuta, ndërsa ka thumbuar edhe Komisionin Evropian, të cilin e quajti një mekanizëm ferri, duke shkaktuar të qeshura tek të pranishmit.
“Dua të falënderoj sinqerisht Komisionin Europian, që është një makineri ferri që financohet nga taksapaguesit europian për t’ua nxirë jetën të gjitha këtyre vendeve që janë në këto procese, por nga ana tjetër është lakmuesi me i sigurt për testin e çdo vendi.
Dhe në këtë aspekt dua të falënderoj të gjitha ata që kontribuojnë këtu në Shqipëri, që duke punuar pa orar çdo ditë për të kuptuar deri në fund ecurinë në të gjitha prioritet na japin mundësinë që në të kemi një këndvështrim objektiv të arritjeve tonë.
Kështu që KE është edhe ngushëllimi më i madh për dhimbjet e shkaktuara në gjithfarë lloj burimesh e kalesh që për arsye të tyre i bien Shqipërisë më qafë më shumë sesa e meriton”, u shpreh Rama.
Më herët, Rama u pyet nëse do të pranonte propozimin e Presidentit Ilir Meta për shtyrjen e zgjedhjeve me qëllim zgjidhjen e krizës politike, gjë për të cilën tha se nuk do të ndodhë, teksa shtoi se më 1 qershor do të nisë fushata elektorale dhe se kjo është e pakthyeshme.
