Katër gola për vendin e katërt, shkëlqen Liverpool (Video)

Liverpooli ka fituar me rezultat të thellë 4-0 në ndeshjen e tyre në transfertë me Bournemouthin, e cila ishte e vlefshme për javën e 18-të të kampionatit anglez. Pas dy barazimeve radhazi, skuadra e drejtuar nga Jurgen Klopp i është kthyer fitoreve në Ligën Premier pikërisht në ndeshje ndaj Bournemouthit. Reds e dominuan gjithë takimin, forca dhe uria e tyre u pa qysh nga minutat e para, por u desh të presim minutën e 20-të për të parë zhbllokimin e rezultatit, kur Philippe Coutinho shënoi një gol të bukur duke kaluar disa lojtarë pas asistimit të mbrojtësit Andrew Robertson.

Vetëm pas gjashtë minutave erdhi edhe goli i 2-0, ku protagonist ishte mbrojtësi Dejan Lovren, i cili shënoi me kokë pas asistit të Roberto Firminos. Deri në fund të pjesës së parë, të kuqtë arritën të gjejnë edhe një gol tjetër, ku kësaj radhe ishte i zakonshmi Mohamed Salah që shënoi një gol të bukur në minutën e 44-të dhe dërgoi skuadrat në pushimin e pjesës së parë 3-0.

Edhe pjesa e dytë foli për skuadrën nga Anfield që vazhdoi me sulme, por edhe menaxhoi mirë lojën duke arritur të shënojnë edhe një gol tjetër dhe të vulosin fitoren. Ishte sulmuesi brazilian, Roberto Firmino, i cili shënoi në minutën e 66-të për 4-0 dhe vulosi rezultatin përfundimtar të kësaj ndeshjes. Kjo fitore e kthen Liverpoolin në pozitën e katërt në tabelë me 34 pikë të mbledhura, ndërsa Bournemouthi renditet në vendin e 16-të me 16 pikë. Në ndeshjen e ardhshme, Liverpool do të udhëtojnë në Emirates për derbin e javës ndaj Arsenalit, ndërsa Bournemouthi udhëton drejt Manchester City.