Rreth 800 milionë euro fonde janë mbledhur nga familjet e pasura dhe komunat franceze për katastrofën e Notre Dame në Paris, e ku dyshimet e para bien mbi një aksident në ashensorin e kantierit të punimeve për mirëmbajtjen e Katedrales. Mediat franceze raportojnë se vatra e zjarrit mund të ketë qenë baza e shigjetës së shkrumbuar, për t’u përhapur më pas në të gjithë çatinë.
Në një fjalim përpara popullit, presidenti Emmanuel Macron tha se solidariteti pas zjarrit në Notre Dame është prova se populli francez nuk ndalet kurrë. Ai premtoi se do të rindërtojnë Katedralen edhe më të bukur.
“Secili dha atë që mundi, secili në vendin e tij, në rolin e tij. Ky popull jemi ne, popull ndërtuesish. Kemi shumë për të rindërtuar. Po, ne do ta rindërtojmë Katedralen Notre Dame edhe më të bukur, dhe dua që kjo të arrihet brenda 5 viteve, ne mund ta arrijmë”.
