Opozita ka nisur betejën finale për të kërkuar pavlefshmërinë e zgjedhjeve të 25 Prillit. Ankimimet e koalicionit PD-LSI kanë nisur sot në Kolegjin Zgjedhor me kërkesën për pavlefshmërinë e zgjedhjeve në qarkun e Gjirokastrës. Ka qenë avokati i PD-së Ivi Kaso që ka paraqitur para Kolegjit provat që tregojnë, sipas tij, se si është ndikuar procesi zgjedhor nga qeveria.
Si argument kryesor Kaso ka ngritur përfshirjen e institucioneve shtetërore në dhënien e përfitimeve për shumë shtetas, duke ndikuar drejtëpërdrejtë në devijimin e vullnetit të shqiptarëve.
“Është ndikuar procesi parapërgatitur me vendimmarrje të tilla të qeverisë, siç është vendimi për ndryshimin e pagave për mjekët. Janë vendosur vendime të tjera, akordimi i fondeve në vlera të ndryshme për kategorinë rurale për bujqësinë dhe zhvillimin rural. Pavarësisht ndalimit që parashikon legjislacioni 4 muaj para zgjedhjeve, pavarësisht qëllimit që jo vetëm në mënyrë formale ndaloi mazhorancën që të përdorte burimet, por edhe dhënien e benefiteve kategorive të ndryshme të shtetasve, ky ndalim është shkelur me të dyja këmbët duke u përdoror çdo burim shtetëror dhe benefit.
Struktura kriminale e vënë në punë nga mazhoranca, nga qeveria për të influencuar në rezultat është e njëjta në të gjitha qarqet. Ajo që ndryshon janë aktorët. Qeveria me anë të vendimmarrjeve synon dhe ia arrin në një masë domethënëse duke ndikuar në mënyrë të paligjshme vullnetin e lirë të shqiptarëve”, tha Kaso.
Përfaqësuesi i opozitës theksoi edhe ndërhyrjen arrogante të qeverisë në Gjirokastër, ku përmes një vendimi të Komitetit Teknik të Eskpertëve iu ndalua ardhja shqiptarëve që jetojnë në Greqi. “Ky vullnet u deformua nëpërmjet ndërhyrjeve më arrogante. Në rastin e Gjirokastrës iu mohua një pjesë e mirë e shtetasve, që ishin jo mbështetës së mazhorancës për të marrë pjesë në zgjedhje”, tha Kaso para përfaqësuesve të Kolegjit Zgjedhor. Kaso ka vënë theksin edhe në faktin se, nëpunësve civilë apo arsimtarëve iu kërkua pjesëmarrje e detyruar në takime elektorale. “Më e rëndë është kërkesa për lista me emra që variojnë nga 20-30 për çdo zyrtar apo mësues”, deklaroi Kaso para Kolegjit Zgjedhor./Tirana Today
