Tre të vdekur e dy të plagosur është bilanci tragjik nga masakra që ndodhi në Klos. Policia njoftoi se viktimat janë babë e bir; Ilir (Liri) Shira, 46 vjeç dhe Kenado Shira, 17 vjeç. Është konfirmuar se autor i kësaj ngjarje tronditëse është Fiqiri Mjeshtri, 39 vjeç, i cili ka qëlluar i vetëm në një lokal në qendër të qytetit. Edhe ky i fundit ka përfunduar i vdekur, pasi vrau veten 900 m larg vendngjarjes. Në këtë ngjarje, janë plagosur dhe shtetasit Eglantin Hasula, 39 vjeç me të birin Renato Hasula, 17 vjeç.
Si ndodhi ngjarja?
Ngacmimet dhe shantazhet e vazhdueshme, në Instagram që dy të rinjtë Kenado Shira, 17 vjeç, dhe Renato Hasula, po 17 vjeç, (djem tezesh) kanë bërë kundrejt vajzës së Fiqiri Mjeshtrit, kanë shkaktuar një tragjedi në Klos, me tre viktima dhe dy të plagosur.
39-vjeçari qëlloi disa herë me pistoletë në rrugën kryesore të qytetit, duke lënë të vdekur në vend 17-vjeçarin Kenado Shira, ndërsa babai i tij, Liri Shira ndërroi jetë rrugës për në spital. Autori, Fiqiri Mjeshtri u gjet i vetëvrarë në shtëpinë e tij në fshatin Dars. Në këtë masakër mbetën të plagosur dhe babë e bir, Eglantin dhe Renato Hasula.
Vajza po shantazhohej nga dy kushërinjtë në Instagram
Në dëshminë e saj para hetuesve, vajza e autorit është shprehur se ajo shantazhohej nga dy kushërinjtë në Instagram, dhe se kishte disa ditë që nuk shkonte në shkollë. Kjo gjendje e së bijës është vënë re nga autori, Fiqiri Mjeshtri, i cili e ka pyetur dhe ajo i ka treguar arsyen. Pas kësaj, 39-vjeçari bashkë me dy vëllezërit e tij, ka kërkuar që të sqarohet me dy të miturit.
Dje rreth orës 14:00, tre vëllezërit Mjeshtri, dy anëtarët e familjes Shira dhe dy të familjes Hasula ishin ulur në kafe për tu sqaruar. Biseda ka degraduar në sharje e fyrje. Ata kanë dalë jashtë kafes, ku 39 vjeçari ka nxjerr pistoletën, duke shkaktuar dy viktima e dy të plagosur.
