Gjashtë shqiptarë që ishin pa leje pune janë kapur nga zyrtarët e doganës, në Goslar, në afërsi të qytetit Braunschweig, në Gjermani. Në kohën e kontrollit, ata janë kapur mat teksa punonin, shkruan presseportal.de.
Megjithatë, kapja e tyre nuk është e rastësishme, por erdhi si rezultat i vëzhgimeve dhe dyshimeve të mëparshme, shkruan albinfo.ch.
Para disa javësh, autoritetet e tjera kishin kontrolluar restorantin në fjalë, e në atë kohë dy prej punëtoreve ishin larguar me shpejtësi. Në këtë mënyrë ishin përmbushur kushtet që edhe zyrtarët e doganës të bënin kontrollin për të verifikuar statusin e punës të punëtorëve të restorantit.
Por kësaj radhe, në sajë të një numri më të madh të personelit u bllokuan edhe dyert anësore të lokalit dhe nuk pati mundësi ikjeje për askënd, përcjell albinfo.ch. Kështu, punëtorët e kapur në befasi, por u treguan bashkëpunues.
Kundër gjashtë shqiptarëve janë iniciuar hetimet mbi dyshimin për qëndrim ilegal në Gjermani. Lidhur me qëndrimin e tyre do të vendosin autoritetet për të huaj, ku të përmendurit do t`i marrin pasaportat që u është dashur t`i dorëzonin.
Ndërsa pasoja më serioze e kërcënojnë punëdhënësin. Ai ka leje qëndrimi në Gjermani por mund të akuzohet për punësimin ilegal të të huajve dhe për trafikimin e tyre. E gjithë gjoba për të mund të arrijë deri në 500 mijë euro.
Ndërsa ai vetë nuk shihte asnjë problem gjatë kontrollit të bërë në restorantin e tij. Kjo pasi, sipas tij, të gjithë punëtorët janë familjarë, të afërt e të largët të tij, të cilët “vetëm po e ndihmonin” dhe për këtë nuk kishin marrë paga.
