Vazhdon protesta për vrasjen e 25-vjeçarit, Klodjan Rasha. Protestuesit janë zhvendosur në rrugën “Myslym Shyri” pranë drejtorisë së policisë Tiranë.
Rruga është futur në kaos, ku është hedhur gaz lotsjellës dhe ka prani të shtuar të efektivë të policisë. Ndërkohë, protestuesit kanë djegur koshat e plehrave dhe kanë thyer xhamat e bizneseve në zonë.
Protestuesit kanë shkatërruar dhe goditur me sende të forta edhe godinat e Kryeministrisë, Ministrisë së Brendshme, si dhe zbukurimet e kryera për festat e fundvitit. Qindra qytetarë kanë dalë sot në protestë duke kërkuar dorëheqjen e Ministrit të Brendshëm, Sandër Lleshaj.
Klodian Rasha, 25-vjeç është ekzekutuar me dy plumba këtë të martë, 8 dhjetor, nga një efektiv policie. Ngjarja ka ndodhur në zonën e Laprakës në kryeqytet, pasi i riu kishte dalë orët e para të mëngjesit jashtë banesës së tij, duke thyer orën policore.
Policia shprehet se Rasha ka kërcënuar efektivin e policisë, ndaj ai ka qëlluar në kushtet e vetëmbrojtjes dhe në errësirë. Por, ndryshe thonë familjarët dhe fqinjët të cilët shprehen se rruga është me ndriçim dhe i riu nuk mbante asnjëherë armë me vete.
