Kryeministri Rama tha gjatë prezantimit të paketës antikrizë se familjet të cilat konsumojmë më shumë se 800 kilovat orë, do ta paguajnë energjinë elektrike me çmimin e tregut. Sipas tij, bëhet fjalë për 6-7 përqind e familjeve që rezulton se shpenzojnë mbi 800 kilovat orë dhe kjo masë merret për të ulur konsumin e tepërt të energjisë në kushte krize.
Rama deklaroi se konsumatorët familjarë dhe bizneset e vogla do vijojnë të mbrohen nga rritja e çmimit të energjisë. E ndërsa kush familje harxhon më shumë se 800 kilovat, çdo kWh do ta paguaj energjinë me çmimin e tregut pa përfituar nga mbrojtja.
“Jemi sot i vetmi vend në rajon dhe në Europë që ka marrë një vendim të prerë politik, për të mos e prekur çmimin e energjisë për familjarët dhe biznesin e vogël. Kjo mbrojtje deri tani rezulton edhe arsyeja themelore pse ne kemi inflacioni më të ulët në rajonin tonë, dhe kemi një inflacion arsyeshëm të ulët në Europë.
Por sigurisht që ka një ‘por’ shumë të madh këtu, nisur nga analiza e gjithë fashave të konsumatorëve, kemi mbi 90 përqind konsumatorë familjarë që konsumojnë rregullisht më pak se 800 kilovat orë dhe kemi një numër konsumatorësh rreth 6-7 përqind të totalit që konsumojnë më shumë.
Dhe aty bëhet fjalë për konsumatorë familjarë, me vila me pishina, me oborre, gjëra, për të cilët mendojmë se ka ardhur kohë që nuk mund të paguajë më buxheti i shtetit dhe taksapaguesit, ndaj çdo kilovat mbi 800, do të paguhet me çmimin e tregut. Me ketë synojmë të krijojmë një presion për të ulur konsumin e tepërt të energjisë në kushte krize”.
