Ka zbarkuar në Shkozë IKMT bashkë me policinë dhe FNSH-në, për të vijuar aksionin e nisur një ditë më parë, dhe shembjen e dy shtëpive të fundit.
Aksioni u shoqërua me tensione dhe përplasje mes banorëve dhe policisë, ku dje u shoqëruan në komisariat dy prej tyre, për shkak të rezistencës.
Banorët janë zgjuar nën terrorin policor, ku pritet që të kryhet shembja e dy banesave. Një pjesë e tyre ende shpresojnë se mund të marrin dëmshpërblim, pasi banesat e tyre kanë qenë në proces legalizimi.
“Kanë ardhur me skafandra dhe me pajisje të rënda ushtarake, kujtova se kishte alarm për bombë. Aq shumë policë kanë ardhur”, shprehet një prej banorëve, raporton “faxweb”.
“Jemi në pikën e hallit, pa punë, tani nuk na lejojnë as të shkojmë te shtëpia”, shprehet një tjetër banor, shtëpia e të cilit do të shembet.
Në mbështetje të banorëve ka shkuar sot dhe ish-deputeti Aldo Bumçi, i cili thotë se Rama është duke kryer krim me nxjerrjen e qytetarëve në rrugë të madhe.
“Kjo nuk ka asnjë lidhje me sjellje europiane, këta banorë i kanë të gjitha shanset që të marrin dëmshpërblimin”, u shpreh Bumçi.
