Nga Safete Neza
Jemi vetëm dy ditë para zgjedhjeve dhe fushatës pothuajse i erdhi fundi, teksa nesër do të kemi heshtje zgjedhore.
Gjatë 30 ditëve të fundit kemi parë akuza, premtime, batuta dhe sulme nga më të ndryshmet. Megjithatë, duhet thënë se ekranet televizive, portalet dhe gazetat janë tejmbushur me pothuajse të njëjtat fytyra: Edi Rama, Ilir Meta, Lulzim Basha dhe Petrit Vasili.
Edhe pse në listat e tyre ka plot kandidatë për deputetë që garojnë për herë të parë në zgjedhje, vëmendjen e medias e kanë marrë drejtuesit e partive kryesore politike, duke i lënë disi nën hije fytyrat e reja.
Duket se më shumë se kandidatët, shqiptarët vlerësojnë partinë që kandidon, prandaj në çdo fushatë kemi një neglizhim interesimi për kandidatët e rinj.
Tirana Today ka bërë një vëzhgim në listat zgjedhore të publikuara nga KQZ, duke përzgjedhur tre kandidate femra, që kandidojnë nën siglën e tre partive kryesore: Partia Socialiste, Partia Demokratike dhe Lëvizja Socialiste për Integrim.
Konkretisht, kemi bërë profilet e tre kandidateve të reja, për të parë disi diferencat mes tyre.
Përkatësisht, kemi përzgjedhur Barbara Dodën, kandidate e PD-së; Ruilda Lita, kandidate e PS-së dhe Rea Kotanin, kandidate e LSI-së.
REA KOTANI
Po e nisim nga Rea, e cila renditet e dymbëdhjeta në listën e kandidatëve për deputetë në Tiranë.
Rea ka lindur në Tiranë dhe është vetëm 21 vjeçe, ka mbaruar gjimnazin në shkollën “Petro Nini Luarasi” dhe studion në Universitetin e Tiranës, Fakulteti i Ekonomisë, dega Financë.
Prej dy vitesh, pra që në 2015-ën, Rea është anëtare e Komitetit Drejtues Kombëtar të LSI-së, ndërsa një vit më vonë ajo është zgjedhur nënkryetare e Lëvizjes Rinore për Integrim.
Kandidatja 21-vjeçare dallon për rezultate të larta në mësime, ka përfunduar disa kurse për profesionin e saj, ndërsa ajo që mungon në CV-në e Reas është eksperienca në punë.
Megjithatë, duket se Vasili ka vlerësuar kontributin e Reas në parti, duke e renditur të 12-tën pavarësisht moshës.
CV Rea Kotani by Tirana Today on Scribd
RUILDA LITA
Një tjetër kandidate e re që garon për deputete në listën e Partisë Socialiste, është 23-vjeçarja nga Bulqiza, Ruilda Lita, e cila renditet e 35-ta. Ruilda është kandidatja më e re në listën e Partisë Socialiste, por që renditja e saj nuk është aspak favorizuese për të, duke bërë që kandidimi si deputete të jetë thjesht një plus në CV-në e saj.
Lita studion në degën Informatikë Ekonomike në fakultetin Ekonomik, ndërsa ka disa eksperienca në punë, ndryshe nga kandidatja e LSI-së.
Ajo ka punuar rreth 5 muaj si operatore në një call center në Tiranë, ndërsa më vonë, që në gusht të 2016-ës, është zgjedhur Presidente e një organizate jofitimprurëse për të drejtat e njeriut.
Duket se kryeministri Rama ka ndjekur një strategji krejt tjetër nga ajo e ish-aleatit, duke mos favorizuar asnjë nga të rinjtë në listën e tij në Tiranë, ndërsa duhet thënë se në listën e LSI-së kemi plot 18 të rinj që kanë lindur pas viteve ’90 dhe që garojnë madje edhe në pozicione favorizuese duke siguruar mandatin e tyre në parlament.
Cv Ruilda Lita by Tirana Today on Scribd
BARBARA DODA
Një tjetër vajzë simpatike që garon për deputete, është Barbara Doda nga Tirana, lindur më 05 tetor 1996.
Barbara garon si kandidate e Partisë Demokratike, por renditja e saj, ashtu si e kandidates së PS-së, nuk është aspak favorizuese. Vendi i 23-të në listën e Tiranës, duket se edhe Barbarës do t’i shërbejë thjesht për pasurim të CV-së së saj.
Ajo studion në Fakultetin e Arkitekturës dhe Urbanistikës në Universitetin Politeknik të Tiranës, ndërsa i mungon eksperienca në punë. Është aktivizuar në Forumin Rinor të Partisë Demokratike, gjë që mesa duket e ka diferencuar atë për të kandiduar si deputete, por jo mjaftueshëm për të siguruar një vend në parlament.
Të treja kandidatet e mësipërme janë mjaft të këndshme, të reja dhe plot energji, por duket se vlerësimi i aftësisë së tyre mbetet vetëm tek “kandidimi për deputete në Tiranë”, gjë që është e pamundur nga përllogaritjet për të fituar mandat si deputete.
Gjithsesi, deri në zgjedhjet e ardhshme, kontributi i tyre duhet të shumëfishohet dhe deri në vitin 2021, mbase të rejat e mësipërme do të fitojnë zemrat e kryetarëve të partive për një vend më të sigurt në parlamentin shqiptar./ Tirana Today
CV-Barbara Doda by Tirana Today on Scribd
