Kamza është padyshim surpriza e këtij edicioni të kategorisë Superiore. Ditën e sotme ata kanë mposhtur Partizanin me rezultatin e ngushtë 1-0, me gol të shënuar nga Ymeraj. Kjo ishte humbja e katërt e të kuqve në 9 ndeshjet e zhvilluara deri tani dhe tashmë partizani me dy humbje radhazi përfundon në krizë. Në pjesën e parë u duk një ndeshje jo e luftuar shumë fort, me një Partizan që dominoi, por nuk rrezikoi asnjëherë seriozisht.
Ndërsa në fraksionin e dytë të lojës u nxehën gjakrat pasi të dyja ekipet dëshironin ta fitonin këtë ndeshje. Është Partizani që sulmon në çdo kohë dhe Kamza që pret rastin për ndonjë kundërsulm të mundshëm. Batha godet shtyllën pak minuta pasi fillon pjesa e dytë, ky ishte rasti i vetëm serioz deri në atë moment. Më pas loja ka shumë ndërprerje dhe kartonë të verdhë. Në momentin kur të gjithë prisnin golin e Partizanit, 10’ minuta nga fundi është Kamza që nis një kundërsulm mjaft të bukur me Plakun, i cili finalizohet në gol nga Ymeraj. Të kuqtë e Iulianos provojnë të hidhen në sulm me të gjitha fuqitë por e kanë të pamundur të depërtojnë në mbrojtjen e Kamzës në ato minuta të fundit.
Ky rezultat mbanë në vendin e katërt Kamzën dhe e bën ekipin surprizë të kampionatit, që ka grumbulluar 15 pikë dhe ka siguruar vendin e katërt. Ndërsa nga ana tjetër Partizani qëndron në vendin e pestë momentalisht me 11 pikë dhe do ta ketë të vështirë të ringrihet pas kësaj humbjeje. Kjo humbje mund ta zhysë në një krizë mjaft të madhe Partizanin, tek të cilët priten të merren masa mjaft të mëdha si tek stafi drejtues dhe tek lojtarët.
