Policia e Britanisë së Madhe hedh dyshime se 39 trupat e pajetë të gjetur në një kamion në Angli, janë pjesë e trafikut njerëzor që menaxhohet nga mafia kineze “Kokë-gjarpërinjtë”.
Sipas mediave vendase, viktimat janë të nacionalitetit kinez, ndërsa mësohet se mes emigrantëve ndodhej edhe një adoleshent.
Grupi mafioz “Kokëgjarpërinjtë” vijnë nga zona Fuxhian e Kinës. Ata merren kryesisht me trafikimin e njerëzve që duan të emigrojnë nga Kina në vendet e pasura.
Kreu më i famshëm i grupit ka qenë Motra Ping, e cila në vitet 1980 u merrte nga 17 mijë dollarë për kokë kinezëve emigrantë për t’i sjellë në SHBA; nga 35 mijë dollarë në vitet 90, dhe sot mendohet se ky çmim është rritur edhe më shumë, edhe deri në 70 mijë dollarë.
Për t’i detyruar që të paguanin tarifën, pasi futeshin në SHBA, ajo përdorte gangsterët e Fuxhianit për t’i dhunuar e trembur.
Motra Ping, e cila u arrestua në vitin 2000, ndërroi jetë në burg nga një sëmundje e rëndë.
Edhe pas vdekjes së saj, mafia Fuxhianeze ka vazhduar të kryejë rrëmbime nga më të ndryshmet, duke u bërë gjithnjë e më e dhunshme.
