Një familje shqiptare është aksidentuar rëndë në Marostica, Itali. Sipas mediave italiane vajza e vogël e familjes, vetëm 14-muajshe ka pësuar dëmtime të rënda.
Vogëlushja është dërguar menjëherë në spitalin e Padovës, ndërsa po lufton me jetën pasi mjekët janë detyruar t’i presin njërën këmbë për shkak të dëmtimeve. Gjithashtu edhe çifti i bashkëshortëve është shtruar në spital, ku gruaja ka pësuar fraktura në krah dhe burri ka prerë damarët pasi u godit nga xhami i makinës.
Makina me të cilën po lëvizte familja shqiptare u përplas me një kamionçinë që po drejtohej nga një 58-vjeçar italian. Nga kontrollet e kryera rezultoi se italiani po i jepte makinës nën efektin e alkoolit. Pas ngjarjes së rëndë, shoferi italian tentoi të largohej nga vendi i aksidentit, por patrulla policore e ndaloi menjëherë.
