Kamza është shumë pak kilometra nga qendra e qytetit, por e vetmja mënyrë e furnizimit me ujë të pijshëm janë zgjidhjet alternative si shpimet apo puset.
Temperaturat e larta dhe vala e të nxehtit bën që mungesa e ujit ndjehet edhe në gjërat elementare. Por edhe në mungese të ujësjellësit prej 27 vitesh, banorët shprehen se vijojnë të paguajnë taksën e ujit, si kusht i Bashkisë së Kamzës për të përfituar shërbimet e tjera.
“Kemi paguar taksën për punë certifikate se pa i paguar detyrimet bashkisë nuk ta japin. I themi shih se nuk ka ujësjellës, ata nuk vijnë fare. Ujin e kemi nxjerrë me mjete primitive, me truma i themi, por ne nga nxehti nuk ka më ujë toka, tani e blemë. Blejmë ujë me lekë”, shprehen banorët.
Gjithashtu edhe rruga Buna ka probleme me kanalizimet, madje ajo është shtruar prej vitesh.
“Në radhë të parë kërkojmë ujin se nuk kemi prej vitesh. Bashkia e dinë se ne kemi bërë kërkesë edhe për kanalizimin e ujërave të zeza dhe të bardha, as njëherë nuk kanë marrë masa. Lekët i duan punë nuk bëjnë”, tregojnë banorët për Report Tv.
Edhe pse përreth zonës së Laknasit janë tre stacione pompimi që furnizojnë me ujë Kamzën dhe zona të caktuara të Tiranës akoma banorët vuajnë që prej viteve 90 problemin e furnizimit me ujë.
