Protesta e sotme e opozitës para Parlamentit është shoqëruar me tensione dhe përplasje mes policisë dhe protestuesve, ndërsa nuk ka munguar as gazi lotsjellës.
Deputeti i PS-së, Paulin Sterkaj ishte një ndër deputetët i cili u sulmua nga protestuesit të cilët nuk lejuar futjen e tij në sallën e Parlamentit. Stërkaj ka folur pas mbylljes së seancës plenare për deklaratat e ish-deputetit të LSI-së Petrit Vasili.
Deputeti i PS u u shpreh se nëse preket një deputet i mazhorances, Vasili dhe ish deputetët e opozitës do mbajnë përgjegjësi. Stërkaj tha gjithashtu se ka telefonuar Vasilin, por ky i fundit nuk i ka hapur telefonin.
Në një prononcim për “BalkanWeb” ish deputeti i LSI Petrit Vasili ka thënë se nuk ka komunikuar me Sterkajn pasi nuk e ka dëgjuar telefonatën e tij.
Vasili u shpreh se nuk ka bërë thirrje për asgjë, por ka thënë së deputetët e mazhorancës nuk përfaqësojnë popullin.
“Në orën 18:15 ky deputet i ka rënë telefonit por e kam parë shumë vonë. Nuk ka komunikuar me mua. Janë dy telefonata afër e afër që s’i kam dëgjuar. Nuk kam bërë thirrje për asgjë. Kam thënë që nuk janë deputetë të popullit dhe nuk përfaqësojnë popullin” -tha në një prononcim për ‘BalkanWeb’ Petrit Vasili.
DEKLARATA E VASILIT NË PROTESTË
Gjatë protestës Vasili tha se deputetët i janë fshehur popullit, duke i krahasuar me minjtë.
“Vëllezër dhe motra këtu është populli. Këtu janë djemtë e popullit. Këtu janë vajzat e popullit. Atje janë minjtë, minjtë janë futur në vrimë, kanë hyrë si minj dhe duan të dalin si minj, po i presim. Çfarë do të bëjnë? Do të flenë aty? Këtu do të kalojnë, por këtu nuk do të kalojnë dot sepse këtu është populli. Këta i janë fshehur popullit dhe rrinë të fshehur mbas fustanit të Gramoz Ruçit. As tek fustani i Gramoz Ruçit dhe as tek brekushet e Edi Ramës nuk i shpëton dot njeri. As brekushet e Edi Ramës ashtu me erë siç janë. Siç e dini, sot është dita ku populli do të thotë fjalën e tij dhe do të pastrojë Parlamentin nga ata minj që e kanë qelbur dhe e kanë ndyrë. Aty do të jetë vendit i fjalës së lirë, vendi i fjalës së popullit dhe jo vendi i atyre që e bën pis atë Parlament. Këtu do rrimë pa u kthyer mbrapa, ju kam thënë asnjë hap pas derisa Edi Rama të ikë, të shporret. Edi shporru. Edi Shporru”, tha Vasili.
(BalkanWeb)
