Gjykata e Posaçme e Apelit ka refuzuar për të tretën herë kërkesën e ish-gjyqtares së Krujës, Enkelejda Hoxha, e cila ka shprehur shqetësimin më herët për t’u kujdesur për djalin e sëmurë.
Avokati ka paraqitur para gjykatës raportet psikologjike për fëmijën, raport për rëndimin e gjendjes shëndetësore të djalit, si edhe raport mjekësor të babait të saj. Djali i ish-gjyqtares së akuzuar për korrupsion dhe lirimin e personave me dënime të rënda vuan nga një sindromë e rëndë, por sërish Gjykata e Posaçme nuk e ka marrë parasysh këtë situatë.
Hoxha qëndron në paraburgim prej 5 muajsh, si e dyshuar për “korrupsion”. Me urdhër të SPAK, Enkelejda Hoxha u arrestua bashkë me 9 persona të tjerë me akuzën e “korrupsionit”. Ata u akuzuan se kishin ngritur një skemë përmes të cilës, ulnin dënimet ose lironin nga burgu të dënuar për vepra të rënda penale kundrejt parave.
Muaj më parë, gjyqtarja me anë të një kërkese ka kërkuar që të ndryshet masa e sigurisë nga “arrest me burg” në “arrest shtëpie”, pasi ka djalin sëmurë, i cili vuan nga autizmi dhe se vajza e mitur ka braktisur shkollën që në momentin që nëna e saj është arrestuar.
“Gjendja shëndetësore e djalit tim është rënduar. Ai ka nevojë për kujdesin tim. Vajza e mitur ka braktisur shkollën që pas arrestimit tim”, thuhej në kërkesën e saj.
