Kreu i Partisë Demokratike nuk sheh asgjë spektakolare pas përmbytjeve që përfshinë të gjithë Shqipërinë.
Në kundërpërgjigje të fotos së publikuar nga kryeministri Rama, i cili e quante spektakolare foton e tërheqjes së lumit Seman, Basha ka publikuar dy foto të tjera, teksa radhit disa arsye përse nuk ka asgjë spektakolare në Darëzezë, Ferras, Novoselë, Dërmenas, Fushë-Krujë etj.
Teksa kishim një moment paqeje mes politikanëve, duket se tashmë i jemi kthyer realitetit me akuza e kundërakuza.
Kryedemokrati e akuzon Ramën se po bën propagandë, të cilën sipas tij duhet ta lërë dhe të nisë t’u zgjidhë hallet mijëra familjeve që janë prej 3 ditësh pa ujë, drita dhe ushqime.
REAGIMI I BASHËS:
Nuk ka asgjë spektakolare në Darzezë, në Ferras e në shumë fshatra të tjera të Fierit ku balta ka mbuluar dhjetëra shtëpi e ka shkaktuar dëme të rënda materiale. Dhe në Dërmenas po ashtu.
Asgjë spektakolare nuk ka në Novoselë e në zona të tjera të Vlorës ku, si pasojë e përmbytjeve, ka mungesa bazike, nga ushqimet tek dritat dhe uji.
Asgjë spektakolare nuk ka në Fushë-Krujë, në Bilaj, në fshatin Hasan dhe lagje të tjera, ku uji dhe balta kanë përmbytur e marrë me vete shumë pasuri dhe kursime të qytetarëve.
Po, ka dy gjëra spektakolare!
Spektakolare është përpjekja për ta nxjerrë këtë fatkeqësi në media e në ekrane si sukses qeveritar!
Spektakolare është braktisja e qytetarëve nga qeveria dhe lënia nën mëshirë të fatit pas asnjë ndihmë!
Edi Rama duhet ta lërë propagandën e t’u zgjidhë hallet mijëra familjeve, që janë prej tre ditësh pa ujë, pa ushqime e drita!
Edi Rama duhet t’i dëmshpërblejë për humbjet e pallogaritshme që kanë pësuar, pasi dimri është i gjatë dhe i papërballueshëm në këto kushte.
