Gjykata e Posaçme e Apelit për Korrupsionin dhe Krimin e Organizuar (GJKKO) ka refuzuar kërkesën e biznesmenit, Ylli Ndroqi, për heqjen e sekuestrove ndaj televizioneve dhe pasurive të tij dhe kërkesën për 130 milionë euro dëmshpërmblim.
Avokatët e Ndroqit, në përfundim të seancës së sotme në Gjykatën Speciale deklaruan se dy mediat, RTV Ora dhe Ora News si dhe pronat e presidentit të Yldon Media Group dhe familjes së tij, vijojnë të mbahen nën sekuestro, ndonëse afatet ligjore kanë kaluar.
“Edhe gjatë seancës së sotme, argumentet e Prokurorisë së Gjykatës nuk e mohojnë faktin që ne jemi në tejkalim të këtij afati dhe gjykata vijon gjykimin. Kjo gjykatë vijon në paligjshmëri gjykimin e kësaj çështjeje, dhe do të mbajë të sekuestruar pronat në paligjshmëri”, tha Besnik Muçi, një nga avokatët mbrojtës duke nënvizuar se vendimet e kësaj gjykate do të apelohen.
Pasi gjykata rrëzoi dy kërkesat e palës mbrojtëse, u kërkua përjashtimi i gjyqtares. “Me qëndrimin që mbajti gjyqtarja, sot duke rrëzuar dy kërkesat plotësisht të mbështetura në ligj, është shprehur dhe për thelbin e çështjes”, tha avokati Muçi.
Avokatët pohuan se do të apelohet vendimi i masës së sekuestros, por dhe vendimi i pushimit të gjykimit.
“Pa diskutim do apelojmë. Nuk jemi në shinat e ligjit, por kemi dalë arave e gjykojmë sipas vlerësimit të secilit”, tha avokati Besnik Muçi.
